A programación da XLVIII Mostra de Teatro Galego de Cariño continúa non só coas representacións que conforman o cartel desta edición, senón tamén coa entrega dos galardóns correspondentes á edición anterior. Tras a función de onte, protagonizada polo Grupo Chévere coa obra Ictus, o concelleiro de Cultura, Andrés Balado, fixo entrega á compañía do Premio Público Adulto da Mostra 2025. O edil aproveitou a ocasión para felicitar ao elenco polo seu talento e agradecer a súa participación nunha edición na que volveron conquistar ao público.
O Grupo Chévere fíxose co recoñecemento no 2025 e grazas á súa obra As Fillas Bravas de Momán 2025. Tras a representación deste traballo, o grupo teatral acadou un total de 520 puntos. Non é a primeira vez que a compañía conquista un dos galardóns da Mostra. Así, no 2024 xa o conseguiran grazas a As Fillas Bravas e o mito de Casandra.
Programación
A programación continuará mañá, mércores 5 de agosto, coa obra familiar Berenguela na gaiola, de Galeatro e Xarope Tulú, ás 12:00 horas (1,50 euros). Ás 22:00 horas, a bailarina e creadora Mariña Lestón presentará Costa da Morte. Cartografía dun naufraxio, unha proposta dirixida a público adolescente e adulto (6 euros).
O xoves 6 de agosto, a compañía Tarabela Creativa levará ao Auditorio Municipal, ás 12:00 horas, o espectáculo familiar Tarabela Ambulante (1,50 euros). Xa pola noite, ás 22:00 horas, De Ste Xeito porá en escena a comedia Feminísimas, destinada ao público adulto (6 euros).
O venres 7 de agosto, a música e o humor serán protagonistas coa actuación de Píscore, que presentará Concerto Singular ás 12:00 horas (1,50 euros). Tras a representación, faráselle entrega do Premio do Público Infantil da pasada edición á compañía Píscore. Ás 22:00 horas, o actor e humorista Carlos Blanco subirá ao escenario do Auditorio Municipal coa súa proposta A Penúltima (6 euros).
O sábado, 8 de agosto, a edición despedirase cunha dobre proposta na Porta da Pulida. Ás 13:00 horas, a compañía A Vela Circo ofrecerá o espectáculo circense Enredos, dirixido a todos os públicos e con entrada gratuíta. Pola noite, ás 22:00 horas, o ilusionista Joshua Kenneth pechará a programación con Degustación de imposibles, un espectáculo de maxia tamén para todos os públicos e con entrada de balde.