A Compañía Píscore recibiu este venres o Premio Público Infantil da Mostra de Teatro Galego de Cariño 2025, un galardón que recoñece a proposta mellor valorada polo público familiar na pasada edición do certame.
O premio foi entregado polo concelleiro de Cultura, Andrés Balado, tras a representación de ‘Concerto Singular’, espectáculo co que a compañía regresou este ano ao escenario da Mostra.
Píscore acadou este recoñecemento grazas a ‘Molto Barroco’, a proposta coa que participou na edición de 2025 e que sumou un total de 684 puntos, converténdose na obra infantil favorita do público.
A Mostra despedirase este sábado con dous espectáculos de balde
A XLVIII Mostra de Teatro Galego de Cariño continuará esta noite, ás 22:00 horas, coa actuación do actor e humorista Carlos Blanco, que presentará ‘A Penúltima’ no Auditorio Municipal.
A programación despedirase o sábado, 8 de agosto, cunha dobre cita na Porta da Pulida. Ás 13:00 horas, a compañía A Vela Circo ofrecerá ‘Enredos’, un espectáculo circense para todos os públicos. Xa pola noite, ás 22:00 horas, o ilusionista Joshua Kenneth pechará esta edición con ‘Degustación de imposibles’, un espectáculo de maxia tamén para todos os públicos.